التقليد الأعمى حتى في التكنولوجيا..وياقلبي أرقص!

مش عيب أبداً إن الواحد يقلد الناس في الحاجة الحلوة بعد ما يعملها فلترة في دماغه.

لكن العيب إن الواحد يبقى بغبغان و يردد كلام الغير بدون فهم أو علم أو أي نوع من أنواع التفكير.

طالما واحد أجنبي و شعره أصفر قال إن تغيير البورتات ليس حلاً إذن يبقى لازم الناس متعملوش، و رغم إن الراجل يقصد إنه مش حل للنوم مرتاح و لكن العباقرة بتوعنا بيفهمو إنه لازم ميغيرش البورت و إلا هيبقى عنده خزنة في حتة ضلمة ومش مقفولة!

أه هو كدا...يا تخلي البورت زي ماهوا يااما أنت مبتعرفش حاجة و الخزنة والضلمة و البتنجان المخلل معاك..

هو في كدا ياعالم ؟

هو أنا مقلتش؟ ولا أنت جاوبت؟ طب بص ياسيدي... بيقولك إن الهندسة العكسية هي حبة كلام . أه هي حبة كلام عاجبك ولا مش عاجبك؟ حبة كلام ولو قلت غير كدا تبقى أنت كنت شغال في السي أي أيه أو الكي جي بي.

بقى علم الهندسة الإجتماعية اللي من قبل التاريخ حبة كلام و يعتبر علم حديث و بيتطبق من التلفونات و البنوك بس.

كل دا مكفاكوش صح؟ طب بص بقا ياسيدي كمان. جوجل طلع وحش و كخة وهو السبب في إختراق مواقع الناس!!

عارفين المشكلة فين؟ إن اللي بيقولو الكلام دا بيعتبرو نفسهم هاكرز .

لفهم هذه التدوينة يرجى مراجعة هذه الروابط :

http://www.linuxac.org/forum/showthread.php?t=10343

http://www.linuxac.org/forum/showthread.php?t=10164

http://www.linuxac.org/forum/showthread.php?t=10130

http://www.linuxac.org/forum/poll.php?do=showresults&pollid=59

و قولولي حمدله على السلامة عشان أنا لسة عامل حادثة يوم التلات اللي فات و معرفش ربنا نجاني إزاي منها! يعني كنت خلاص تصورت إني مت و طالع فوق أقابل أبو لهب و قبيلة قريش لكن طلع عمر الشقي بقي و الحمد لله.

وحشتوني صحيح ياعالم يالي لسانكم طويل ويالي لسانكم قصير و صحابي كمان واحشني جداً.