انا وسلاكوير و النواة و عيد الميلاد و حاجات تانية

هالو؟

بقالي كتير مكتبتش حاجة ومشغول بشكل غير طبيعي...ولكن واحشني جدا أكتب في البلوج..

واحشني صحابي جداً...ومش هقول أسماء عشان منساش حد...وواحشني الناس اللي بتتخانق معايا رغم طولة لسانهم إلا انهم جزء لا يتجزأ من الجانب السيبري للحياة.

امبارح كان عيد ميلادي ودي طبعا مناسبة غير مهمة وحدث تافه- على الاقل بالنسبالي- وفي ناس بعتتلي ميلات تعيد عليا و بجد دي حاجة فرحتني جدا جدا،لان محدش مشترك في منتدى مثلا ولا في الفيس بوك و هينزله تذكير بعيد الميلاد..لكن في ناس فاكرة اليوم من دماغها وهو دا اللي فرحني، عموما معظمهم عقول برمجية و يمكن عشان كدا حافظين الارقام كويس؟ :D

لاحظت حاجة غريبة جدا خلتني متشوق أكتب تدوينة...وهي إن انا عملت كومبايل سنة 2007 في يوم 2/2 لسلاكوير...

وامبارح برضو -صدفة بحتة- اقرر اعمل كومبايل لاني اشتريت جهاز جديد لان القديم بوردته والبروسيسور ودعوا -والنظام لسة شغال!!- وقلت أعمل كرنل جديدة عشان تشوف الهاردوير الجديد و تبقى الحياة حلوة معاه خصوصا ان في سينسورز في الكور تودو الجديد و حاجات كدا غريبة على النواة القديمة.

طبعا كالعادة عملتها فروم سكراتش وكالعادة طلعت عيني 4 ساعات ونص....ولكن طبعا لذّة الانتصار ملهاش حل :D

المهم بجد صدفة عجيبة إن سنة 2007 عملت كومبايل يوم عيد ميلادي....وكل الوقت دا مكنتش رقيت الكرنل...ويوم ما ارقيه يكون برضو يوم عيد ميلادي؟

والله صدفة غير مقصودة :)

----

شكرا من قلبي لسلاكوير اللي أستحملني كل الفترة دي وعمره ما هنج ولا كان داون لدرجة ان الهاردوير خرب في خلال 3 سنين والنظام لسة شغال زي الأسد...ومش ناوي أرقيه برضو غير على اول 2010.

----

طبعاً أنا مكنتش بعيد عن عالم الاندرجراوند بل كنت قريب منه جدا الفترة اللي فاتت بحكم العمل مع بعض الاجانب اللي طلعوامن العالم السفلي، الدنيا مليانة حاجات جديدة الايام دي و ربنا يسترمن الايام اللي جاية علينا...وعلى اخوانا العرب والاجانب.

----

امبارح دخلت بلوج احد الاصدقاء القدامى و افتكرت اقتباس من
TCLH:

Third, have fun. Have a lot of fun.

And never, never, never setup an honeypot (hi Lance!).

----

انا كاتب رسالة لبعض الناس على السرفر....اللي هيقراها هياخد جايزة!!

وللتسهيل فالرسالة هيكون أولها
Sofy-Says:

مش هسهل اكتر من كدا!!

----

انا بفكر في خطة لإحياء موقعنا
Linux4arab.net
لان المستوى دلوقتي في المواقع العربية أقل من زبالة..

كان في الامن العربي ومن ثم سيكيورتي جورز وللأسف الاتنين اختفوا -هاي بلاك! هالو روك!- حرام فعلاً الناس تبطل تتعلم واحنا كمان نبطل نتعلم و نقرا لان في كسل طغى على الناس!

---

انا رجعت خلاص بشكل كامل و ويلكم بالناس اللي عايزة تتناقش في أي حاجة وكل حاجة وعن اي حاجة..
---

ممكن أنزل كمان يوم ولا يومين موضوع جديد وهحاول اراسل كل الناس!
---

اخيراً.....بجد واحشني كلكم و كل عام و أنتم بخير.