شاعر الشعب..عبد الرحمن بن مساعد

أنا بالعربي كدا بحب الراجل دا...وبعتبره فلتة مبتتكررش غير كل فين وفين!

بداية معرفتي بيه كانت بالصدفة عن طريق سماع بعض الأغاني لمحمد عبده وكانت أغنية -شبيه الريح- وطبعا وقتها مكنتش أعرف انه امير ولاحاجة وكنت بعتبره شاعر محترم وبس.

ولكن من حوالي 4 سنين جه بلاك هنتر -فاكرين الراجل دا؟- وعرفني بيه وإذا بي أفاجئ بإن ليه قصائد رائعة جداً وسمعتها أكتر من مرة وتعجبت منها لبساطتها وخفتها و قوة معانيها ولكن مكنتش أعرف مين اللي كاتبها وقتها ولا كنت بهتم.

ومن ثم بدأت أكتشف كل قصائده و صدقاً الراجل دا بيكتب شعر من قلبه بشكل لايوصف...يعني جرب تسمع القصيدة دي بصوت آمال ماهر ؟ وهي قصيدة إحترامي للحرامي...حاجة خرافية ومعاني مفيش أبسط من كدا

أنا بدعوا كل من يحب الشعر العامي زي كدا إنه يقرأ قصائد الأمير عبد الرحمن بن مساعد ومش هيندم.

اللي زاد إعجابي بيه إنه ورغم أنه امير ودي حاجة كبيرة جدا في المملكة إلا إنه إنسان بسيط في كلامه وغير متكلف بالمرة في حديثه مع الناس .
ولو عايز تحبه أكتر وكنت مصري فكفاية إنك تسمع شعره في وصف مصر

تحية لهذا الرجل البسيط الأمير المحترم عبد الرحمن بن مساعد. وكم أتمنى مقابلته لو زار المحروسة لأخبره بأن له جمهور كبير مصري يعرفه و يقدره جيداً ويقدر شعره كثيراً كأحد رموز الشعر العامي في العالم العربي.