التلت خرافات الهاكرية! هاهاها

من يوم ما الواحد عرف النت دا وفي أكتر من خرافة بيسمعها دايما منذ أبد الأبدين و يمكن في 3 منهم لحد دلوقت منتشرين، من شوية كنت بلف في المواقع الفضائية و لاقيت كالعادة المواضيع إياها اللي والله ماتغيرتش من 5 سنين عن دلوقت.

1- أول خرافة تتمثل في وجود ثغرة في البي إتش بي يستخدمها الهاكرز العظام و هي تمكن الهاكر العظيم من تخطي السيف مود . هذه الخرافة بدأت عام 2003 حسب علمي والله أعلم . طبعا توجد ثغرات تخطي و لكن تاريخ هذه الخرافة يرجع لقبل الزمن الحالي، و لا أعرف مصدر الخرافة أي بلد و لكن في الغالب هي أمريكا الأحلامية.

2- الخرافة الثانية تتمثل في وجود برنامج يستطيع إختراق السرفرات ، لا يهم نوع الخادم ويندوز أو لينوكس....على فكرة دي مش تريقة وفي ناس فعلا مصدقة حاجات زي دي. من ضمنهم واحد معتوه للأسف زاملته في يوم من الأيام في جلسات القهاوي، وكان مقتنع إن هناك بعض الناس من الممكن إختراق أجهزتهم وهي مش على الإنترنت من خلال الأقمار الصناعية... وعادي يعني هتخترق بالقمر الصناعي و جهازك مطفي مفيش مشكلة.

3- وجود ريموت روت . الخرافة دي بدأت أواخر عام 2005 وكان سببها حفنة من الرعاع الأجانب و الناس ساعتها جالها رعب في ركبها لكن العبد لله كان واثق من زيف الإشاعة و إلا كانت الحكومات أتدخلت لأن في أنظمة دول تعتمد على نواة لينوكس اللي فيها ثغرة ريموت دي!!

دول يمكن الخرافات التلاتة الأشهر عالمياً، أما عربيا فهناك برضو خرافات جميلة :

1- أن هناك هاكر عربي أستطاع إختراق الياهو لمدة سبع دقائق و الحقيقة أن مصدر هذه الشائعة يعود لعام 2001، المهم إن محدش سمع بالإختراق دا غير العرب...وساعتها متصفحي الياهو كانو نايمين وكذلك شركة الياهو مخدتش خبر بالموضوع. ازاي متعرفش!

2- أل ايه في هاكر سعودي كتبت عنه المجلات و الصحف السعودية و الهندية و الإسرائيلية و الباكستانية والبتنجانية و المخللية و الكشرية و الكبسية... لأنه أستطاع إختراق وزارة الدفاع الإسرائيلية و أخترق ناسا كمان. و شوية شوية كان هيحلق في الفضاء مع بتوع ناسا لكن طلع بيخاف من الأماكن المرتفعة....و على ذكر الفضاء و الشخص اللي أنا أقصده دا فمش هقول غير.....الله يمسك بالخير يارولز!

3- دايما في لوكال روت مع مديري المنتديات الفضائية، يعني مش هتلاقي عضو مسجل في المنتديات دي إلا ومتأكد 100% إن صاحب المنتدى الفضائي عنده ثغرات لوكال و ريموت كمان! للكرنل و بيحاول بكل الطرق إنه ياخد منه الثغرات دي بكل الأشكال!

حد عنده حكايات تانية ؟ عشان نوثقها في الموضوع دا؟

بالمناسبة الفترة اللي فاتت كنت مشغول إجتماعياً عشان كدا مكنتش بكتب حاجة جديدة. ويدوب لسة راجع من يومين تلاتة .

أفتقدت في هذه الفترة قلة أدبكم و أفتقدت تعليقات الأصدقاء، و تعليقات الدراويش اللي أول ما رجعت لاقيتها منورة البلوج و بإختصار أفتقدت البلوج

و دمتم